სამი ევროპული ქვეყანა დღეს ოფიციალურად აღიარებს პალესტინის სახელმწიფოს და ამით, შეუერთდება 144 სხვა ქვეყანას, რომლებმაც უკვე გადადგეს ეს ნაბიჯი.
ირლანდიის კაბინეტი, სავარაუდოდ, დაადასტურებს გადაწყვეტილებას ამ დილით პარლამენტში რამდენიმესაათიანი დებატების შემდეგ.
გუშინ სიტყვით გამოსვლისას ირლანდიის პრემიერ-მინისტრმა საიმონ ჰარისმა თქვა: „ჩვენ გვჯერა ისრაელისა და პალესტინის სახელმწიფოს არსებობის, რომლებიც გვერდიგვერდ უნდა ცხოვრობდნენ მშვიდობასა და სტაბილურობაში. ჩვენ გვჯერა ამის იმ დროს, როდესაც სხვები ცდილობენ დაბომბონ ეს იმედი”.
ესპანეთის პრემიერ-მინისტრი პედრო სანჩესი კი ამბობს, რომ პალესტინის სახელმწიფოს არსებობა „მშვიდობის ერთადერთი გზაა“.
„პალესტინის სახელმწიფოს აღიარება არა მხოლოდ ისტორიული სამართლიანობის საკითხია, არამედ ამით ჩვენ ყველანი მშვიდობის დამყარებისკენ მივისწრაფვით“, – განაცხადა სანჩესმა.
